İş təcrübəsi olmadan güclü CV necə hazırlanır?

İnsan resursları mütəxəssisləri bir CV-yə çox qısa vaxt ayırır. Orta hesabla 7-10 saniyə ərzində sənə dair ilkin qərar formalaşdırılır. Bu o deməkdir ki, sənin CV-n həmin qısa müddətdə diqqət çəkməli və əsas məlumatları aydın şəkildə göstərməlidir. Məhz buna görə CV hazırlayarkən əsas sualı özünə verməlisən. işəgötürən niyə məni seçməlidir?
İş elanları adətən konkret tələblərlə paylaşılır. İşəgötürən həmin vakansiyaya uyğun namizəd axtarır. CV-ləri bu meyarlara əsasən qiymətləndirir. Sənin CV-n də müraciət etdiyin iş elanları ilə uyğun olmalıdır. Yəni bacarıqların, təhsilin və məqsədlərin həmin vakansiyanın tələblərinə cavab verməlidir. Əgər CV-də bu uyğunluq aydın şəkildə görünürsə, işəgötürənin səni növbəti mərhələyə dəvət etmə ehtimalı artır.
CV işəgötürənin səninlə ilk tanışlıq vasitəsidir. Buna görə də ilk baxışdan səliqəli və oxunaqlı görünməsi çox vacibdir. Dizayn, mətnin quruluşu və istifadə olunan dil birbaşa sənin haqqındakı ilkin fikri formalaşdırır. Əgər CV qarışıq, nizamsız və anlaşılmazdırsa, işəgötürən sənin məlumatlarını oxumağa həvəs göstərməyə bilər. Bu isə sənin üçün böyük bir fürsətin itməsi deməkdir. Ona görə CV-də hər bölmə aydın olmalı, başlıqlar seçilməli və mətn rahat oxunmalıdır.
Vakansiyalar üzrə müraciət edərkən məqsədin təkcə iş tapmaq yox, həm də özünü inkişaf etdirmək olduğunu göstərməkdir. Bu, işəgötürənə sənin məsuliyyətli və gələcəyə yönəlmiş biri olduğunu göstərir. Belə namizədlər vakansiyalar üzrə seçim zamanı daha çox diqqət çəkir.

CV formatını düzgün seç

CV formatı sənin özünü işəgötürənə necə təqdim etdiyini göstərən əsas vasitədir. Bu, sanki sənin peşəkar hekayəndir və bu hekayə nə qədər aydın, məntiqli və oxunaqlı olsa, qarşı tərəfdə bir o qədər müsbət təsir yaradar. Düzgün format seçmək CV-nin uğurunun yarısını təşkil edir. Çünki işəgötürən sənin məlumatlarını rahat oxuya bilməli, axtardığı məlumatı tez tapmalıdır. Əgər CV qarışıq, nizamsız və anlaşıqsızdırsa, çox yaxşı bacarıqlara sahib olsan belə, bu üstünlüklər geridə qala bilər.
CV formatını seçərkən öz vəziyyətini real qiymətləndirməlisən. İş təcrübən varmı, yoxmu, hansı sahədə oxumusan, hansı bacarıqlara sahibsən kimi amillər format seçiminə birbaşa təsir edir. Məsələn, uzun illər müxtəlif şirkətlərdə çalışmısansa, iş təcrübəsini ön plana çıxaran format sənin üçün daha uyğun olar. Amma hələ rəsmi iş təcrübən yoxdursa, bu halda başqa bir yanaşma seçmək daha məqsədəuyğundur.
Əsas məqsədin odur ki, CV-n sənin güclü tərəflərini ön plana çıxarsın. Təcrübən yoxdursa, bu boşluğu bacarıqların, təhsilin, könüllü fəaliyyətlərin və şəxsi xüsusiyyətlərin ilə doldura bilərsən. Doğru format isə bütün bunları səliqəli şəkildə təqdim etməyə imkan verir.

Xronoloji CV nədir?

Xronoloji CV formatında iş təcrübələri tarix sırasına görə düzülür. Ən son işlədiyin yer yuxarıda, əvvəlkilər isə aşağı hissədə yer alır. Bu format əsasən artıq müəyyən iş təcrübəsi olan şəxslər üçün uyğundur. Çünki burada əsas diqqət sənin hansı şirkətlərdə çalışdığına, hansı vəzifələri tutduğuna və nə qədər müddət işlədiyinə yönəlir.
Əgər bir neçə il ərzində fərqli vəzifələrdə çalışmısansa, bu format sənin karyera inkişafını açıq şəkildə göstərməyə kömək edir. İşəgötürən sənin haradan başladığını və zamanla necə irəlilədiyini rahatlıqla görə bilir. Bu isə sənin peşəkar inkişafını nümayiş etdirir.
Amma hələ heç bir rəsmi iş təcrübən yoxdursa, xronoloji CV sənin üçün uyğun seçim sayılmır. Çünki bu formatda əsas yer iş təcrübəsinə verildiyi üçün CV-n boş və zəif görünə bilər. Bu da işəgötürəndə yanlış təəssürat yarada bilər. Ona görə də təcrübəsiz namizədlər üçün başqa formatlara üstünlük vermək daha məntiqlidir.

Funksional CV nədir

Funksional CV formatı bacarıqlara və şəxsi keyfiyyətlərə fokuslanır. Bu formatda əsas sual budur: sən nə bacarırsan və şirkətə nə qata bilərsən. Yəni harada işlədiyin yox, hansı bilik və bacarıqlara sahib olduğun ön plana çıxır.
Bu format yeni məzunlar və iş təcrübəsi olmayan namizədlər üçün çox uyğundur. Çünki burada sənin güclü tərəflərini rahat şəkildə göstərmək mümkündür. Məsələn, ünsiyyət bacarığın, komanda ilə işləmə qabiliyyətin, problem həll etmə bacarığın, texniki biliklərin bu formatda geniş şəkildə izah edilə bilər.
Funksional CV-də bacarıqlar adətən bölmələr şəklində təqdim olunur. Hər bölmədə konkret bacarıqlar və onların harada qazandığın açıqlanır. Məsələn, universitet layihələri, könüllü fəaliyyətlər, təlimlər və kurslar bu bacarıqların mənbəyi kimi göstərilə bilər. Bu da işəgötürənə sənin real potensialını göstərir.
Bu formatın ən böyük üstünlüyü odur ki, təcrübənin olmaması diqqətdən kənarda qalır və əsas fokus sənin bacardıqlarına yönəlir. Bu isə sənin üçün böyük üstünlükdür.

Yeni məzunlar üçün ideal format

Yeni məzunsansa və ya hələ tələbəsənsə, funksional CV sənin üçün ən uyğun seçimlərdən biridir. Çünki bu mərhələdə əsas üstünlüyün təhsil müddətində qazandığın biliklər və bacarıqlardır. Funksional CV sənə bu bilikləri geniş şəkildə izah etməyə imkan verir.
Bu formatda bacarıqlarını kateqoriyalara ayıraraq yaza bilərsən. Məsələn, ünsiyyət bacarıqları, texniki biliklər, təşkilatçılıq qabiliyyəti, liderlik xüsusiyyətləri və s. Hər kateqoriya altında konkret nümunələr vermək çox vacibdir. Məsələn, universitetdə təqdimat etdiyini, layihə rəhbəri olduğunu, tədbir təşkil etdiyini və ya könüllü fəaliyyətlərdə iştirak etdiyini qeyd edə bilərsən.
Yeni məzunlar üçün bu format özünü daha yaxşı ifadə etməyə imkan verir. Çünki iş təcrübəsi olmasa belə, sənin məsuliyyətli, öyrənməyə açıq və motivasiyalı biri olduğunu göstərmək mümkündür. İşəgötürən də məhz bu xüsusiyyətlərə diqqət yetirir.

Effektiv profil bölməsi yarat

Profil bölməsi CV-nin ən vacib hissələrindən biridir. Çünki işəgötürən sənin kim olduğunu ilk olaraq bu hissədən anlayır. CV-ni açan şəxs əvvəlcə bu bölməyə baxır. Sənə dair ilkin fikir formalaşdırır. Buna görə də profil bölməsi sənin özünü qısa, lakin təsirli şəkildə təqdim etdiyin yer olmalıdır. Burada məqsəd odur ki, sənin əsas üstünlüklərin, məqsədlərin və işəgötürənə nə qatacağın aydın şəkildə görünsün.
Profil bölməsi çox uzun olmamalıdır. Amma mənasız və boş cümlələrlə də dolu olmamalıdır. Sən bu hissədə özünü tanıdırsan. Hansı sahədə oxuduğunu, hansı bacarıqlara sahib olduğunu, hansı istiqamətdə inkişaf etmək istədiyini və niyə bu işə uyğun olduğunu ifadə etməlisən. Bu bölmə sənin peşəkar kimliyinin xülasəsi kimidir.
Burada istifadə etdiyin dil səmimi, aydın və real olmalıdır. Şişirdilmiş ifadələr, yalan məlumatlar və süni cümlələr işəgötürən tərəfindən tez sezilir. Ona görə də özünü olduğu kimi, amma ən yaxşı tərəflərinlə təqdim etməyə çalış.

Profil bölməsində nələr yazılmalıdır?

Profil bölməsində əsasən üç suala cavab verməlisən. Sən kimsən, nə bacarırsan və şirkətə nə verə bilərsən?. Bu sualların cavabı qısa, konkret və aydın olmalıdır. Məsələn, hansı sahədə təhsil aldığını, hansı mövzularda biliklərinin olduğunu, hansı bacarıqlara sahib olduğunu və hansı istiqamətdə işləmək istədiyini qeyd edə bilərsən.
Bu bölmədə özünü tərifləmək yox, real güclü tərəflərini göstərmək vacibdir. Məsələn, ünsiyyət bacarığın güclüdürsə, bunu konkret şəkildə ifadə et. Komanda ilə işləməyi bacarırsansa, bunu vurğula. Öyrənməyə açıq olduğunu, məsuliyyətli biri olduğunu qeyd et.
Profil bölməsi qısa olmalıdır, amma dolğun məna verməlidir. Təxminən 3-4 cümlə kifayətdir. Əsas məqsəd işəgötürənin diqqətini çəkmək və CV-nin qalan hissəsini oxumağa maraq yaratmaqdır.

Güclü cümlə nümunələri

Profil bölməsində istifadə edəcəyin cümlələr sənin şəxsiyyətini və potensialını göstərməlidir. Məsələn, yeni məzunsansa, hansı sahədə oxuduğunu və hansı layihələrdə iştirak etdiyini qeyd edə bilərsən. Ünsiyyət bacarığın güclüdürsə, vurğula. Komanda işi ilə bağlı təcrübən varsa, bunu açıq şəkildə yaz.
Məsələn, marketinq sahəsində oxuyan biri olduğunu və rəqəmsal layihələrdə aktiv iştirak etdiyini qeyd edə bilərsən. Özünü məsuliyyətli, öyrənməyə açıq və məqsədyönlü biri kimi təqdim edə bilərsən. Komanda daxilində effektiv işlədiyini, problemləri analiz edib həll etməyi bacardığını vurğulaya bilərsən.
Bu cümlələr sənin real xüsusiyyətlərini əks etdirməlidir. Kim olduğun, nəyi bacardığın və hansı istiqamətdə irəliləmək istədiyin aydın şəkildə görünməlidir. Unutma ki, profil bölməsi sənin ilk təmas nöqtəndir. Burada yaratdığın təəssürat çox əhəmiyyətldiir.

Təhsil bölməsini strateji istifadə et

Əgər hələ rəsmi iş təcrübən yoxdursa, təhsil bölməsi CV-də ən güclü tərəfin ola bilər. Çünki bu mərhələdə sənin biliklərini, səylərini və inkişafını göstərən əsas mənbə məhz təhsilindir. Sadəcə universitetin adını yazmaqla kifayətlənmək olmaz. Təhsil bölməsi sənin hansı sahədə oxuduğunu, bu müddətdə nələr qazandığını və özünü necə inkişaf etdirdiyini göstərməlidir.
Bu bölmə işəgötürənə sənin maraq dairəni, məsuliyyət hissini və öyrənməyə yanaşmanı nümayiş etdirir. Hansı fənlərdə uğurlu olduğunu, hansı layihələrdə iştirak etdiyini, hansı mövzulara daha çox maraq göstərdiyini burada qeyd edə bilərsən. Bu məlumatlar sənin potensialını göstərmək üçün lazımdır.
Təhsil bölməsini yazarkən məqsədin sadəcə faktları sadalamaq yox, bu prosesin sənə nə qazandırdığını göstərmək olmalıdır. Məsələn, analitik düşünmə, təqdimat bacarığı, araşdırma aparmaq kimi xüsusiyyətləri bu bölmədə dolayı yolla vurğulamaq olar.

Təhsil məlumatlarını necə yazmalı?

Təhsil bölməsində mütləq olaraq universitetin adı, fakültə, ixtisas və məzuniyyət ili qeyd olunmalıdır. Bu əsas məlumatlardır və işəgötürən üçün ilkin baxışda vacib rol oynayır.
Bununla yanaşı, oxuduğun müddətdə iştirak etdiyin seminarlar, təlimlər, konfranslar və layihələri də əlavə etməlisən. Məsələn, qrup layihələrində aktiv iştirak etmisənsə, təqdimatlar etmisənsə, kurs işlərin yüksək qiymət alıbsa, bunları qeyd edə bilərsən.
Əgər universitet daxilində hansısa klubun üzvü olmusansa və ya tədbirlərin təşkilində iştirak etmisənsə, bunu da göstərmək çox yaxşıdır. Bu, sənin sosial bacarıqlarını və təşəbbüskar olduğunu göstərir. Təhsil bölməsi sənin yalnız dərs oxumadığını, həm də aktiv tələbə olduğunu sübut etməlidir.

GPA və akademik nailiyyətlər

Əgər ümumi ortalaman yüksəkdirsə, bunu mütləq CV-yə əlavə etməlisən. Bu göstərici sənin məsuliyyətli, çalışqan və məqsədyönlü olduğunu nümayiş etdirir. İşəgötürən üçün bu, sənin işə də eyni məsuliyyətlə yanaşacağını göstərən vacib siqnaldır.
Bundan əlavə, hər hansı təqaüd qazanmısansa, fərqlənmə diplomun varsa və ya akademik müsabiqələrdə iştirak etmisənsə, bunları da qeyd etmək lazımdır. Bu nailiyyətlər sənin öz üzərində işlədiyini və uğur əldə etməyə çalışdığını göstərir.
Akademik nailiyyətlər CV-də sənin zəhmətinin nəticəsidir. Bu məlumatlar işəgötürənə sənin intizamlı və planlı biri olduğunu göstərir.

Könüllü fəaliyyətlərin gücü

Könüllü fəaliyyətlər CV-də çox dəyərli yer tutur. Çünki burada sən maddi qazanc üçün yox, öz istədiyin üçün çalışmısan. Bu da sənin məsuliyyət hissini, insanlara və cəmiyyətə qarşı münasibətini göstərir.
Könüllü işlər zamanı qazandığın təcrübə rəsmi iş təcrübəsi qədər lazımdır. Burada komanda ilə işləməyi, ünsiyyət qurmağı, problemləri həll etməyi və təşkilati bacarıqları inkişaf etdirirsən. Bu xüsusiyyətlər isə istənilən iş yerində çox qiymətlidir.
İşəgötürən könüllü fəaliyyətlərə baxaraq sənin xarakterin haqqında fikir formalaşdırır. Yardımsevər, aktiv və təşəbbüskar biri olduğunu görürsə, bu, sənin üstünlüyünə çevrilir.

Könüllü işlərin CV-də rolu

Könüllü fəaliyyətlər sənin sosial tərəfini açıq şəkildə göstərir. İnsanlarla ünsiyyət qurmaq, fərqli mühitlərə uyğunlaşmaq, kollektivdə işləmək bacarığını nümayiş etdirir.
Məsələn, uşaq evlərində fəaliyyət göstərmisənsə, tədbirlərin təşkilində iştirak etmisənsə, sosial layihələrdə rol almısansa, bunları mütləq CV-də qeyd etməlisən. Bu fəaliyyətlər sənin empatiya qabiliyyətini, məsuliyyət hissini və əməkdaşlığa açıq olduğunu göstərir.
İşəgötürən üçün bu məlumatlar çox dəyərlidir. Çünki şirkətlər yalnız bilikli deyil, həm də düzgün xarakterə sahib insanlarla işləmək istəyirlər. Könüllü fəaliyyətlər isə sənin insan olaraq necə biri olduğunu göstərən ən yaxşı göstəricilərdən biridir.

Digər təcrübələri əlavə et

"Mən heç yerdə işləməmişəm" deməzdən əvvəl mütləq bir az düşün. Çünki çox vaxt insanlar rəsmi iş yerində çalışmadıqlarına görə özlərini təcrübəsiz hesab edirlər. Halbuki həyatın müxtəlif mərhələlərində qazandığın təcrübələr də iş dünyası üçün dəyərlidir. Yay aylarında çalışdığın işlər, tələbəlik dövründə iştirak etdiyin layihələr, könüllü fəaliyyətlər, tədbirlərin təşkili təcrübə sayılır.
Əsas məsələ bu fəaliyyətlərdən nə qazandığını göstərməkdir. Məsələn, bir layihədə iştirak etmisənsə, orada hansı rolu oynadığını, hansı məsuliyyətləri üzərinə götürdüyünü və nəticədə nə öyrəndiyini qeyd edə bilərsən. Bu məlumatlar işəgötürən üçün çox vcaibdir. Çünki o, sənin məsuliyyətli olub-olmadığını, tapşırıqları vaxtında yerinə yetirib-yetirmədiyini və komanda ilə necə işlədiyini bilmək istəyir.
Digər təcrübələri CV-yə əlavə edərkən onları kiçiltmə və əhəmiyyətsiz göstərmə. Sən həmin fəaliyyətlər zamanı real bacarıqlar qazanmısan. Bu bacarıqlar gələcək iş həyatında da sənə fayda verəcək.

Part-time işlər

Part-time işlər də çox dəyərli təcrübə hesab olunur. Kafedə işləmək, mağazada satış etmək, ofisdə köməkçi olmaq kimi işlər sənə bir çox vacib bacarıqlar qazandırır. Bu işlər zamanı insanlarla ünsiyyət qurmağı, müştərilərlə davranmağı, məsuliyyət daşımağı və vaxtını düzgün bölməyi öyrənirsən.
Məsələn, mağazada işləyərkən satış bacarığın inkişaf edir, müştərilərin ehtiyaclarını anlamağı öyrənirsən. Kafedə işləyərkən isə stresli vəziyyətlərdə sakit qalmağı, eyni anda bir neçə işi idarə etməyi bacarırsan. Bunların hamısı işəgötürən üçün çox önəmli xüsusiyyətlərdir.
CV-də part-time işlərini qeyd edərkən konkret vəzifələrini və qazandığın bacarıqları yaz. Məsələn, müştərilərlə ünsiyyət qurduğunu, kassada işlədiyini, sifarişləri qəbul etdiyini və məsuliyyət daşıdığını qeyd edə bilərsən. Bu, sənin real iş mühiti ilə tanış olduğunu göstərir.

Təcrübə proqramları

Təcrübə proqramları iş həyatına hazırlıq mərhələsi hesab olunur. Bu proqramlar sənə real iş mühitini tanımaq, sahən üzrə biliklərini praktikada tətbiq etmək və peşəkar insanlarla ünsiyyət qurmaq imkanı yaradır.
Əgər hansısa şirkətdə təcrübə keçmisənsə, bunu mütləq CV-yə əlavə et. Orada hansı şöbədə çalışdığını, hansı tapşırıqları yerinə yetirdiyini və nə öyrəndiyini qeyd et. Məsələn, sənə verilən sənədlərlə işləmək, hesabat hazırlamaq, müştərilərlə əlaqə saxlamaq kimi işləri qeyd edə bilərsən.
Təcrübə proqramları işəgötürən üçün çox dəyərlidir. Çünki bu, sənin artıq iş mühiti ilə tanış olduğunu və öyrənməyə açıq biri olduğunu göstərir. Bu cür təcrübələr gələcək işə qəbul prosesində sənin xeyrinə işləyəcək.

Bacarıqlarını ön plana çıxar

Bacarıqlar sənin CV-də ən vacib hissələrdən biridir. Çünki işəgötürən sənin şirkətə nə verə biləcəyini məhz bu bölmədən anlayır. Təcrübən olmasa belə, bacarıqların səni ön plana çıxara bilər. Ona görə də bu hissəni çox diqqətlə doldurmalısan.
Burada əsas məqsəd özünü real şəkildə təqdim etməkdir. Hansı sahədə nələri bacardığını açıq və konkret yazmalısan. Şişirdilmiş və həqiqətə uyğun olmayan məlumatlar sonradan problem yarada bilər.
Bacarıqlarını yazarkən onları kateqoriyalara ayırmaq daha məqsədəuyğundur. Texniki bacarıqlar, şəxsi bacarıqlar və dil bilikləri kimi bölmələr yarada bilərsən. Bu, CV-ni daha səliqəli və oxunaqlı edər.

Texniki bacarıqlar

Texniki bacarıqlar sənin konkret olaraq hansı proqramları və alətləri bildiyini göstərir. Məsələn, Excel proqramında işləməyi bacarırsansa, bunu mütləq qeyd et. Photoshop, dizayn proqramları, proqramlaşdırma dilləri və digər texniki biliklərin varsa, bunları açıq şəkildə yaz.
Bu bacarıqları sadalayarkən səviyyəni də qeyd etmək yaxşı olar. Məsələn, başlanğıc, orta və ya yaxşı səviyyə kimi. Bu, işəgötürənə sənin real bilik səviyyən haqqında düzgün məlumat verir.
Texniki bacarıqlar ofis işləri, IT sahəsi, dizayn və marketinq kimi sahələrdə əhəmiyyətlidir. Ona görə də bu bölməni boş keçmək olmaz.

Yumşaq bacarıqlar

Yumşaq bacarıqlar sənin şəxsiyyətinlə bağlı xüsusiyyətlərdir. Ünsiyyət qurmaq bacarığı, liderlik, komanda ilə işləmək, stresə davamlı olmaq, problemləri həll etmə qabiliyyəti bu qrupa daxildir.
Bu bacarıqlar istənilən iş yerində çox dəyərlidir. Çünki işəgötürən yalnız bilikli deyil, həm də düzgün davranışa sahib işçi axtarır. Məsələn, komanda ilə işləməyi bacaran, məsuliyyətli və ünsiyyətcil biri olmaq böyük üstünlükdür.
Yumşaq bacarıqları yazarkən onları real nümunələrlə dəstəkləmək yaxşı olar. Məsələn, universitetdə qrup rəhbəri olduğunu, layihələrdə aktiv rol aldığını və ya tədbirlərin təşkilində iştirak etdiyini qeyd edə bilərsən.

Dil və kompüter bilikləri

Bildiyin dilləri mütləq CV-də qeyd etməlisən. Hər dil üçün səviyyəni də göstərmək lazımdır. Məsələn, başlanğıc, orta, yaxşı və ya sərbəst səviyyə kimi. Bu məlumat işəgötürən üçün çox vacibdir.
Kompüter biliklərini də konkret şəkildə yaz. Ofis proqramlarını bilirsənsə, bunu qeyd et. Məsələn, Word, Excel, PowerPoint kimi proqramlarla işləmə bacarığın varsa, mütləq əlavə et.
Dil və kompüter bilikləri bu dövrdə demək olar ki, hər sahədə tələb olunur. Ona görə də bu bölməni diqqətlə doldurmaq sənin üçün böyük üstünlük yaradacaq.

CV dizaynı və görünüş

CV-nin dizaynı sənin peşəkarlığını ilk baxışdan göstərən amillərdən biridir. İşəgötürən CV-ni açan kimi onun səliqəli, oxunaqlı və aydın olub-olmadığına diqqət edir. Məlumat nə qədər dəyərli olsa da, əgər düzgün formada təqdim olunmayıbsa, qarşı tərəf üçün maraqsız görünə bilər. Buna görə də CV-nin görünüşü ən az məzmunu qədər önəmlidir.
Dizayn sadə və başa düşülən olmalıdır. Məqsəd diqqəti bəzək-düzəyə yox, məlumatlara yönəltməkdir. Hər bölmə aydın şəkildə ayrılmalı, başlıqlar gözə çarpmalıdır. İşəgötürən CV-yə baxarkən lazım olan məlumatı tez tapmalıdır. Əgər axtardığı məlumatı tapmaqda çətinlik çəkərsə, CV-ni kənara qoya bilər.
CV dizaynı sənin nizam-intizamını da göstərir. Səliqəli və düzgün qurulmuş CV sənin məsuliyyətli və diqqətli biri olduğunu göstərir. Bu isə işə qəbul prosesində müsbət təsir yaradır.

Səliqəli dizaynın əhəmiyyəti

Qarışıq və nizamsız dizayn oxuyan insanı yorur. Bir səhifədə çox fərqli şriftlər, ölçülər və rənglər olduqda diqqət dağılır. Bu da CV-nin oxunmasını çətinləşdirir. Ona görə dizaynı mümkün qədər sadə saxlamaq lazımdır.
Ağ fon üzərində qara mətn ən uyğun seçimdir. Bu, həm oxunaqlıdır, həm də rəsmi görünür. Bölmələr arasında kifayət qədər boşluq olmalıdır ki, mətn sıx görünməsin. Başlıqlar alt mətndən bir qədər fərqli ölçüdə yazıla bilər. Amma həddindən artıq böyük və ya kiçik olmamalıdır.
Səliqəli dizayn işəgötürənə sənin öz işinə ciddi yanaşdığını göstərir. Bu da sənin haqqındakı ümumi fikri müsbət istiqamətdə formalaşdırır.

Font və rəng seçimi

Font seçimi CV-nin oxunaqlılığı üçün çox vacibdir. Sadə və klassik şriftlərdən istifadə etmək məsləhətdir. Məsələn, Arial, Calibri, Times New Roman kimi fontlar CV üçün uyğundur. Bu şriftlər göz yormur və rəsmi görünüş yaradır.
Şrift ölçüsü nə çox böyük, nə də çox kiçik olmalıdır. Başlıqlar bir qədər böyük, əsas mətn isə rahat oxunan ölçüdə seçilməlidir.
Rəng məsələsində isə sadə olmaq daha yaxşıdır. Qara, tünd boz və ya tünd mavi kimi rənglərdən istifadə etmək olar. Çox rəngli dizayndan uzaq durmaq lazımdır. Parlaq və qarışıq rənglər CV-ni qeyri-peşəkar göstərə bilər.
Məqsəd CV-ni göz oxşayan yox, rahat oxunan və aydın olan formada hazırlamaqdır. Bu qaydalara əməl etsən, CV-n daha peşəkar və cəlbedici görünəcək.