Müasir dövrdə dizayn sahəsi kreativ düşüncə və innovativ həllər tələb edən vacib peşə sahələrindən biridir. Texnologiyanın və rəqəmsal medianın inkişafı ilə dizayn sahəsinə olan tələbat daha da artmışdır. Qrafik dizayn, interyer dizaynı, veb-dizayn, UX/UI dizayn və məhsul dizaynı kimi müxtəlif istiqamətlərdə peşəkar mütəxəssislərə ehtiyac duyulur. Şirkətlər öz brend kimliklərini gücləndirmək, məhsul və xidmətlərini vizual olaraq cəlbedici etmək üçün təcrübəli dizaynerlər axtarırlar. Dizaynerlər müasir bazar tələblərinə uyğun yaradıcı həllər təqdim etməklə yanaşı, istifadəçi təcrübəsini təkmilləşdirmək üçün innovativ yanaşmalar tətbiq edirlər. Peşəkar dizaynerlər müxtəlif sahələrdə – reklam agentliklərində, texnologiya şirkətlərində, startaplarda və böyük korporasiyalarda iş imkanları tapa bilərlər. Eyni zamanda, frilans və uzaqdan iş imkanları sayəsində dizaynerlər qlobal bazara çıxış əldə edə bilirlər. Dizayn sahəsində işləmək istəyənlər üçün kreativ düşüncə, texniki bacarıqlar və müasir dizayn proqramlarına hakim olmaq əsas şərtlərdən biridir. Dizaynerlərin portfolioları onların bacarıqlarını və təcrübələrini nümayiş etdirmək üçün vacib vasitə sayılır.

Dizayn nədir?

Dizayn, bir şeyi gözəl və istifadəyə yararlı etmək üçün onun görünüşünü və quruluşunu planlamaqdır. O, qrafik dizayn, veb-dizayn, interyer dizaynı və moda kimi sahələrdə tətbiq olunur. Dizaynın əsas məqsədi insanlara daha rahat, funksional və cəlbedici məhsullar təqdim etməkdir. Müasir dövrdə dizayn texnologiya və innovasiya ilə sıx bağlıdır və yaradıcı yanaşma tələb edir. Həm estetik, həm də funksional tələbləri qarşılamaq dizaynın uğurlu olması üçün vacibdir.

Dizayn üzrə iş elanlarında vəzifə öhdəlikləri nələrdir?

Dizayn özündə çoxsaylı ənənəvi və rəqəmsal sahələri birləşdirir. Bu da dizaynla bağlı iş elanlarında istiqamətə uyğun olaraq bir çox fərqli öhdəliklərin olmasına gətirib çıxarır. Lakin ümumi olaraq dizaynerlər üçün əsas vəzifə öhdəlikləri aşağıdakılardır:

Layihələrin hazırlanması və inkişaf etdirilməsi

Müştəri və ya şirkət rəhbərliyi ilə işləyərək dizayn tələblərini və gözləntilərini anlamaq, yeni dizayn konseptləri və ideyalar hazırlamaq, mövcud dizaynları təkmilləşdirmək və yeniləmək.

Qrafik və vizual dizayn işlərinin həyata keçirilməsi

Şirkətin brend kimliyinə uyğun vizual materiallar hazırlamaq, reklam, sosial media və çap materialları üçün dizaynlar yaratmaq, loqo, poster, broşura, vizit kartı və digər qrafik dizayn elementlərini hazırlamaq.

Rəqəmsal və veb-dizayn işləri

Vebsayt və mobil tətbiq interfeyslərinin dizaynını hazırlamaq (UX/UI dizayn), sosial media və onlayn platformalar üçün kreativ vizual kontentlər yaratmaq, animasiya və multimedia dizayn işləri həyata keçirmək (əlavə bacarıq tələb oluna bilər).

Dizayn proqramlarından istifadə etmək

Adobe Photoshop, Illustrator, InDesign, Figma, Sketch və digər dizayn proqramlarında işləmək, 3D modelləşdirmə və vizualizasiya proqramlarından istifadə etmək (məsələn, Blender, AutoCAD, 3ds Max).

Trendləri izləmək və kreativ yanaşmalar tətbiq etmək

Müasir dizayn trendlərini və yeni texnologiyaları izləmək, yenilikçi və yaradıcı yanaşmalar tətbiq edərək fərqli dizayn həlləri təqdim etmək.

Müştəri və komanda ilə əməkdaşlıq etmək

Marketinq, IT və satış komandaları ilə birgə işləyərək şirkətin vizual tərzini inkişaf etdirmək, müştərilərin geribildirimlərini nəzərə alaraq dizaynları optimallaşdırmaq.

Çap və istehsal üçün dizayn işlərini hazırlamaq

Çap üçün uyğun formatlarda dizaynlar hazırlamaq və istehsalat prosesinə nəzarət etmək, material və rəng seçimlərini uyğunlaşdırmaq və keyfiyyətə nəzarət etmək.

Brend tərzini qorumaq və inkişaf etdirmək

Şirkətin brend kitabçasına (brandbook) uyğun dizaynlar yaratmaq, brend üslubunun davamlılığını təmin etmək və inkişaf etdirmək.

Dizayn üzrə iş elanlarında hansı bacarıqlar tələb olunur?

Dizayn sahəsində uğur qazanmaq üçün müxtəlif texniki və şəxsi bacarıqlar tələb olunur. İşəgötürənlər adətən aşağıdakı bacarıqları namizədlərdən gözləyirlər:
Qrafik və vizual dizayn bacarıqları
Rəqəmsal və veb dizayn bacarıqları
Dizayn proqramlarında işləmə bacarıqları
Yaradıcı və analitik düşüncə
Vaxatın idarəcedilməsi və çeviklik
Komanda ilə işləmə bacarığı
Stressə dözümlülük və motivasiyalı olmaq
Problem həll etmə və qərarvermə bacarığı
Xarici dil bilikləri və s.

Dizayn üzrə iş elanları hansı vəzifələr üzrə olur?

Dizayn sahəsi müxtəlif istiqamətləri əhatə etdiyindən, iş elanları fərqli vəzifələr üzrə verilir. Aşağıda ən çox rast gəlinən dizayn vəzifələrini təqdim edirik:
Qrafik dizayner
Veb dizayner
Motion dizayner
3D dizayner
İnteryer dizayner
Eksteryer dizayner
Məhsul dizayneri və s.

Dizayner üzrə iş elanlarında əmək haqqı təxmini nə qədərdir?

Dizayn özündə fərqli bir çox istiqaməti birləşdirən sahə olduğu üçün burda tələblər, iş yükü, vəzifə öhdəliklərinə uyğun olaraq əmək haqqı ilə bağlı qarşımıza müxtəlif miqdarlar çıxa bilər. Bu sahələrdə elan olunmuş vakansiyalara uyğun olaraq maaş aralıqları aşağıdakı kimidir:
İnteryer dizayner - 1000-2000 və ya daha çox
Qrafik dizayner - 700-1500 və ya daha çox
3D dizayner - 1200-1500 və ya daha çox
Veb dizayner - 1500-2000 və ya daha çox və s.
Dizayn sahəsində maaşlar təcrübə, bacarıqlar, şirkətlərin qiymət siyasəti və digər xüsusiyyətlərə görə dəyişə bilər.